Qırımnıñ Rusiye prokuraturası Aqmescit sakinini cermay mahsulatlarını taşığan trenniñ areketi aqqında malümat toplap yollağanı içün «devlet hainliginde» qabaatladı. Bu aqta müessiseniñ matbuat hızmeti iyünniñ 20-nde içtimaiy ağlarındaki saifelerinde haber etti.
«Tahqiqat versiyasına köre, 2023 senesi noyabr ayında Aqmescit sakini mahsus arbiy operatsiyanıñ keçirilmesine qarşı çıqıp, Kefe şeeri yanında olğanda cermay mahsulatlarını taşığan trenniñ qabul noqtasına ketmesi aqqında malümat topladı», – dep aytıla haberde.
Bu adam videonı Ukrayina Mudafaa nazirliginiñ Baş istihbarat idaresi qullanğan çat-botqa yollağadı, dep aytıla.
Tutulğannıñ ad ve soyadları aydınlatılmay, açıq izaatları da yoq. Ukrayina Mudafaa nazirliginiñ Baş istihbarat idaresi de bu haberlerni izaatlamadı. Qabaatı isbatlansa, 20 yılğa qadar apis cezası berile bile.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
