Felemenk vekilleri palatası 1944 senesi qırımtatarlarnıñ Qırımdan sürgün etilüvini qırımtatar halqınıñ genotsidi olaraq tanıdı. İşbu qarar Felemenk parlamentiniñ saytında derc etildi.
Deputat Derk Bosveykniñ 2025 senesi iyünniñ 18-nde teklif etken №2259 resmiy vesiqağa köre, Vekiller palatası şunı qayd etti, «bir qaç memleket qırımtatarlarnıñ kütleviy sürgünligini genotsid olaraq tanıdı»; 1944 kütleviy sürgünlikni «zemaneviy kriteriylerge köre genotsid» olaraq tanıp takbih etti; ükümetni bu cinayetni devlet seviyesinde genotsid olaraq resmiy şekilde tanıma imkânını baqmağa çağırdı.
Şimdi Felemenk ükümeti bu qararnı resmiy şekilde tanıma meselesini baqmalı.
Qırımtatar Milliy Meclisiniñ reisi Refat Çubarov Felemenkniñ parlament azaları, diplomatları ve cemaatçılığına bu qarar içün teşekkürler bildirip, diger memleketlerniñ ükümetleri tarafından qırımtatar genotsidiniñ tanılmasına isse qoşqan Yuqarı Rada, Ukrayina Tış işler nazirligi, Qırımtatar Milliy Meclisi, qırımtatar cemaat teşkilâtları, qırımtatar milliy areketiniñ faalleriniñ ğayretlerini qayd etti.
Ukrayina Tış işler naziri Andriy Sıbiğa Felemenk deputatlarına bu qararları içün teşekkür bildirip, diger memleketlerni aynısını yapmağa çağırdı.
«Ukrayinanıñ Qırım yarımadasında Rusiyeniñ vaqtınca işğal şaraitlerinde taqiplerge oğramağa devam etken qırımtatar halqına küçlü bir birdemlik adımıdır. Bu tarihiy adaletsizlikni tanımaq tek aqiqat ve adalet içün degil, kelecek vahşiyliklerniñ ögüne keçmek içün de pek müimdir», – dep yazdı Sıbiğa X içtimaiy ağında.
1944 qırımtatar sürgünligini Ukrayina, Litvaniya, Latviya, Kanada, Poloniya, Estoniya ve Çeh Cumhuriyetiniñ parlamentleri genotsid olaraq tanığan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.